Komiki lehiaketaren lehen edizio honetako gaia Amaiurko gazteluaren setioa izango da. Amaiurko gazteluaren setioa 1522ko uztailaren 15etik 19ra bitarte egin zuten Gaztela eta Aragoiko armadek. Setioa nabarmena izan zen, bertan bukatu zelako Henrike II.a Nafarroakoaren aldekoek egindako hirugarren saiakera, Erresuma berreskuratzeko 1512ko konkista eta gero.
14-16 urte bitarteko gazteei zuzendua, apirilaren 30a arteko epea izango dute lanak aurkezteko; berauek bakarka edo taldean egin daitezke.
Lehiaketa irekia da (ez da derrigorrezkoa ikastola bateko ikasle izatea) eta teknika ere librea izango da, lanak PDF formatuan aurkeztu beharko diren arren. Lanak euskaraz idatziko dira eta bost orrialdetako luzera izango dute gehienez (komikiaren azala barne). Jasotako komiki lan guztien artetik onena zein den ebatziko du epaimahaiak, eta sari gisa Xabiroi komiki aldizkariaren 2021ko urriko zenbakian argitaratua izango da.
Parte-hartzaile guztien artean hainbat sari zozketatuko dira: 3 tablet, Xabiroi aldizkariaren urteko 10 harpidetza eta Xabiroi bildumak (3 bildumako 5 sorta).
OINARRI-ARAUAK
- Lehiaketaren helburua: gure herriaren Historiaren momentu zehatz batean gertatutakoa komiki-kontakizun bilakatzea.
- Parte-hartzea banaka nahiz taldeka izan daiteke.
- Lanak euskaraz idatziko dira.
- Lanek beste lehiaketetara aurkeztu gabeak izan behar dute.
- Teknika librea izango da, baina PDF formatuan aurkeztuko dira lanak.
- Gehieneko luzera 4 orrialdekoa izango da, eta azala izango da bosgarrena.
- Lanak telematikoki aurkeztu beharko dira honako e-posta helbidera igorrita: ehikomikilehiaketa@ikastola.eus
- Lanak aurkezteko epea: 2021eko apirilaren 30eko 12:00etan bukatuko da.
- Aurkeztutako lanak ikastolen jaien webguneetan egongo dira ikusgai.
- Puntu gehien eskuratzen dituen lana Xabiroi aldizkarian argitaratuko da, 2021eko urriko zenbakian. Nolanahi, gutxieneko kalitaterik ez badu, ez da lanik argitaratuko.
- Parte-hartzaileen artean honako sari hauek zozketatuko dira: 3 tablet, Xabiroi aldizkariaren urteko 10 harpidetza eta Xabiroi bildumak (3 bildumako 5 sorta).
Lehiaketaren oinarri-arauak eta informazio osagarria:
http://www.nafarroaoinez.eus/nafarroa-oinez.asp?IdSeccion=8&IdContenido=133